كيف نقي أطفالنا شر الحوت الأزرق

بخصوص موضوع الحوت الأزرق؛ كتير من الأمهات بدأوا يقلقوا بعد ما ولادهم فعلا بيتكلموا عن اللعبة كتير وعاوزين يجربوها
كلامي هنا بشكل عام مش بخصوص اللعبة بعينها
بخصوص اللعبة نفسها ونفسية المراهق فيه لينك آخر البوست للمهتم.

أنا بس عاوز أنبه على نقاط بسيطة عامة وازاي نوصلها لأطفالنا؛ سواء بخصوص اللعبة دي أو غيرها، والتواصل مع اشخاص غرباء عموما؛ افتراضيين أو من لحم ودم:

١. نقطة تعليم اولادنا السرية والأسرار و الفرق بينه وبين المفاجأة مهم جدا، وده طبعا للأطفال أكتر منه للمراهقين،
السر حاجة حد بيقولهالك ويطلب منك ما تعرفش حد خالص، بس في الحقيقة احنا صغيرين وخبراتنا في الحياة قليلة ممكن الحاجة دي تكون غلط، فلازم ناخد رأي بابا وماما في الحاجات دي، طب ما انتي مرة قلتي انك جايبة تورتة عشان عيد ميلاد كريم وطلبتي مني ما أقولش .. فيه فرقين هنا .. الفرق الأول زي ما قلت لك احنا بنقول لبابا وماما ، الفرق التاني ان دي مفاجأة .. يعني احنا مخبيين عن واحد حاجة معينة وهنقول له بعد شوية ، يعني بعد شوية كله كله بيبقى عارف
لكن لما حد مثلا يعطيك حاجة أو يعمل حاجة ويقولك ما تقولش لحد خالص ولا حتى ماما وبابا .. يبقى ده مش صح، سواء الحد ده كان في الحقيقة أو شات على الموبايل، أو لعبة على الانترنت.

٢. من الحاجات المهمة إن علاقتنا بأولادنا يكون فيها رغي كتير، عشان يتكلموا معانا لازم نكون احنا اصلا بنتكلم معاهم، عشان يعبر لي عن خوفه وحزنه وقلقه لازم اكون أنا بتكلم معاه عن مشاعري وخوفي وحزني وقلقي .. لما بتعامل مع أطفالي دايما بالكتمان عشان ما يحسوش بحاجة وكأن كده بحميهم، هم كمان هيتعاملوا بالكتمان، لأنهم ما جربوش قبل كده يعبروا، وما يعرفوش بيتعمل ازاي.

٣. لازم نعرفهم اننا واخدين بالنا منهم، شايفينهم، منتبهين ليهم بكل معنى الأمومة والأبوة، مش الجلاد المنتظر الخطأ، بلاش يشتكولنا فنقول معلش ونسكت، او يوريك حاجة شايفها هو انجاز فنبتسم وخلاص، أو يحكي عن قصة حصلت له انتي شايفاها مش مستاهلة، فنقوله ماشي، أو حتى ما نقولش ونكمل لعب ع الموبايل، أو مكالمة التليفون مع جارتك اللي هتغير مجرى التاريخ، شوية اهتمام بكلامهم يبان عليك وعلى رد فعلك.

٤. لازم نحسس ولادنا دايما اننا في ضهرهم، اننا سند فعلا، لما يشتكي تاخد له حقه بالطريقة المناسبة للموقف، لازم يكون فيه فرق بين لما يرجع ولما يسكت وما يشتكيش  غير الفرق بتاع: أكيد انت الغلطان

٥. وقت الفراغ مهم، لازم نشغل ولادنا بأنشطة كتير قدر الأمكان، ونعلمهم استغلال الوقت سواء في البيت او برا البيت، لازم نوفر بدايل للملل اللي بيعيشوه، ما ينفعش نمنع بس، وما يكونش فيه بديل.

٦. المتابعة لأنشطتهم وكيفية قضاء وقتهم
وده غالبا بيبدأ بالمشاركة مش بالسيطرة، كمان للسن الأصغر؛ متابعة اللي بيشوفوه في التلفزيون أو يوتيوب أو ألعاب بيلعبوها ، مش بس عشان الحوت الأزرق والانتحار، لكن فيه كتير من المحتوى العنيف أو العنصري أو الجنسي أو المخالف للمعتقدات موجود بكثرة.

٧. نحاول نفهم ولادنا بشكل عام فكرة الألعاب الالكترونية، فيه أنواع كتير الهدف منها التسلية او الاستفادة لكن اللي بيعملوا اللعبة بيكون عندهم أهداف تانية زي انهم يخلوك تدفع لهم فلوس، أو تحط معلومات شخصية عنك عشان يسرقوك، أو معلومات عن البيت أو العنوان، أو مواعيد دخول وخروج باباك واخواتك، أو يطلب طلبات غريبة ، أو يطلب حتى طلبات عادية ويقولك إن ده سر، كل ده معناه ان فيه حاجة غلط في اللعبة دي فما نكملش فيها، ونروح نقول لبابا وماما ضروري

٨. هنرجع تاني نقول ان عشان النقطة اللي فاتت تتحقق والطفل يعرف يجيلك يحكيلك لازم يكون فيه علاقة بينكم تسمح بده.