خدعوك نفسياً فقالوا؛ “الإكتئاب بيحصل بسبب ضعف الإيمان أو ضعف الشخصية”

– من الأفكار الغير صحيحة وللأسف منتشرة جداً أن الإكتئاب بيحصل علشان مريض الإكتئاب إيمانه “مش أد كده” أو أن شخصيته ضعيفه…الكلام دا غلط تماماً.
– الإكتئاب مرض نفسي بيحصل بسبب نقص مادة السيروتونين في المخ
ومادة السيروتونين دي أحد النواقل العصبية الموجودة في المخ واللي بتنظم مزاج وهدوء الإنسان ونقصانها ممكن يسبب كتير من الأعراض زي التوتر والحزن وغيرها الكتير.
– نقصان مادة السيروتونين ليس له أي علاقة بدرجةإيمانك ولا بضعف شخصيتك؛ السيروتونين ممكن ينقص زي ما مادة الإنسولين بتنقص فبيحصل مرض السكر.
– مرض الإكتئاب لييه كتير من الأعراض غير بس الحزن فبنلاقي أعراض جسمانية زي الكسل وزي إضطراب النوم (بالزيادة أو النقصان) أو إضطراب الشهية للأكل (بالزيادة أو النقصان) والشعور بالكسل وقلة الكلام والميل للبعد عن الناس وكمان بيكون فيه أعراض معرفية زي النسيان أو التشتت أو صعوبة التركيز وكتير تاني من الأعراض.
– مشكلة حصر الإكتئاب في إنه بسبب “ضعف إيمان صاحبه” إن اللي حوليه بدل ما بيساعدوه ويقدموله النصحية ويحسو بألمه بيلموه وبيقولو كلام ممكن يكون بيضر أكتر ما بينفع.
-الإكتئاب مرض نفسي بيصيب حوالي 20% من البشر؛ يعني لو أنت عايش في مدينة زي اسكندرية اللي عدد سكانها 5 مليون نسمة ففيها حوالي مليون فرد يعاني من الإكتئاب أو عنده أعراض إكتئابية.
– لو تعرف مريض إكتئاب أو لو كنت أنت نفسك بتعاني من الإكتئاب متتكسفش تطلب العلاج والمساعدة.