#خليها تعدى

#خليلها_تعدي
كتير من البنى آدمين فاكرين إن التفاهم هو الضمان اللى بيخلى العلاقات قوية بين البنى آدمين يعنى لو أنا صاحبت حد فاهمين بعض جداً ده هايخلى عندك ضمان إن علاقتكم هتبقى طيبة، لكن المفهوم ده غلط جداً جدآ جداً….. التفاهم حاجة من الحاجات اللى بتخلى العلاقات كويسة لكن لما أتعمل شغل كتير على علاقات البشر كان أكتر حاجة بتخلى علاقات البشر قوية هى ( التسااااامح ) مش التفاهم، التفاهم بيقلل الفجوة لكن التسامح هو اللى بيخلى العلاقات تدوم.

لو أنت مش ناوى تتسامح فحضرتك كده رامى الكرة فى ملعب الطرف الآخر… العلاقة هى علاقة بين طرفين أنت واللى قدامك يعنى مش هو بس  اللى مسئول عن العلاقة لكن إنت وهو ،هو بيحاول يفهمك بيحاول يلتزم باللى بينو وبينك لكن هو فى الآخر بشر يعنى هايغلط يعنى ممكن يعمل حاجات مش فى توقعاتك. لو احنا كابنى آدمين قررنا نحاكم كل واحد علشان هو غلط علشان هو يدوب ما عملش اللى فى دماغنا أو غلط بعمد أو بغير عمد وقررنا نحاكمه في دماغنا محاكمة “ذهنيه” زى ما بسميها المحاكمة دى الأقصى عقوبة الإنسان بيعملها فى الغالب هى إني ” أنا مش هاكلمه تانى، هابعد عنه، مش هاتعامل مع حد تانى”..

الطريقة دى هاتخليك مع الوقت بتبعد عن الناس كلها ولما بتبعد عن الناس كلها ما بيبقاش ليك علاقات .

كده إنت مابتبقاش كسبان بس بتبعد عنهم وبتفضل قاعد لوحدك مع مبادئك وأفكارك و بتقول هو اللى غلطان هو السبب هو اللى المفروض كان يحترمنى هو … وهو …. وهو .

القصة مش كده؛ القصة إن العلاقات هى هات وخد إنت وواحد آخر… هو عليه جزء من العلاقة وإنت عليك الجزء الثانى .  هو بنى آدم يعنى إيه بنى آدم يعنى التعامل معاه بمثالية شديدة إنه لازم يلتزم بالمواعيد ولازم ولازم ولازم ومش هايخطئ دى حاجة غلط فى المبدء اللى احنا حطينو لازم هانحط مساحة فى توقعتنا تسمح بإن هو هايغلط .

إنت الكسبان بإن إنت تسامح… البشر خطائين والإنستن  اللى قدامك حتى لو كان فاهمك بقصد أو بدون قصد هاتصدر منه أخطاء ولو طريقتك فى التعامل مع الناس إن إنت تديها حكم وكل واحد أخطئ هاتبعد عنه فإنت فى الآخر هاتفضل واقف لوحدك ، بالإضافة وإنت بتصدر الأحكام عليه وإنت مشغول هو غلط ولا ما غلطش وإنت قاعد تدرس الأمر جوه دماغك أو إن إنت قاعد بتقرر إن إنت هاتقاطعه  فإنت شغلت ذهنك واستهلكت طاقة كتير من طاقات الذهنية اللى هى المفروض كانت تتوجه لترفيه أو  لشغل أو لإنتاج. إنت دلوقتى وإنت بتقرر انك مش هاتكلم فلان او هتخاصم فلان أو هاتعامل مع علان إنت بتستهلك من مجهودك الذهنى اللى المفروض يكون مصدر للسعادة ليك مش مصدر لمضايقتك . لو ركزت كده هتلاقى وإنت بتقرر إن أنت هتقاطع فلان أو تبعد عن علان فإنت متضايق حتى وإنت بتعمل كده .

الأسوء من كده اللى بيقرر( يكيد ) هو فعلا بيتإذى نفسه  بشكل كبير .
طيب لو التسامح حاجة مهمة ،التسامح حاجة مهمة مبنية على قبول للآخرين  هنتكلم فى القبول ده فى مقال تانى #
علشان بيزعل ناس لما ما بتفهمهوش صح فعلشان هيبقى عاوز مننا تفصيل .
الاسهل إن إنت تسامح سامح وإنت اللى هاتكسب .

وعلشان كده #خليها تعدي