هل التوحد له علاج؟

الأدوية اللي بتتاخد في حالة التوحد هي لتقليل الأعراض المصاحبة زي الحركات المتكررة كالرفرفة وزي العصبية والتوتر وزي اضطرابات النوم

والأدوية دي نفسها لازم تراجع باستمرار، ولو مافيش أي تحسن بعد ٦ أسابيع يوقف الدواء.
لكن حتى الآن: مافيش دواء للتوحد نفسه
مافيش دواء للتوحد نفسه

طيب بالنسبة لجلسات الأكسجين وحقن تنشيط المخ وتسريع الكلام وغيره
التوصيات العلمية طبقا ل NICE بتقول:

١. لايستخدم النيوروفيدباك (التغذية العكسية العصبية) لتحسين اللغة في الأطفال المصابين بالتوحد
٢. لا يستخدم التكامل السمعي لتحسين اللغة في الأطفال المصابين بالتوحد
٣. لا يستخدم ما يلي بأي حال من الأحوال:
(يعني التدخلات التالية لم يثبت لها أي فاعلية حتى الآن في علاج التوحد رغم مخاطرها المحتملة)
أ. العلاج بإزالة المعادن
ب. العلاج بالأكسجين المضغوط
ج. العلاج بهرمون السكرتين

طب بالنسبة لحقنة تنشيط المخ اللي بألف جنيه؟
وبالنسبة للحقنة بتاعة الكلام اللي ب ٥٠٠٠ جنيه وبتيجي بالطلب؟
لا يوجد إي دليل على أي فايدة لها غير الفايدة العائدة على الطبيب اللي بيوصفها والشركة اللي بتعملها

طب وبالنسبة للعلاج بمالمشاركة مع الحيوانات زي الدلافين وغيرها؟
أو ما يسمى Animal Assisted Therapy
بعض الأبحاث بتقول إن الأطفال اللي عندهم توحد في بيت فيه حيوان أليف قدروا يعملوا علاقة مع الحيوان ده وكان تفاعلهم الاجتماعي أحسن؛ و معظم الأبحاث دي اتعملت على الخيول والكلاب … بس كده

لكن البرامج العلاجية اللي بيتعمل لها إعلانات وتدفع ١٠٠ ألف جنيه وتسيب طفلك في منتجع للدلافين ٣ شهور ، وغيره؛ حتى الآن مافيش بحث علمي يعتمد عليه بيقول إن ده بيعالج التوحد

مشكلة العلاجات غير المعتمدة دي مش بس استغلال الأهالي واستنزاف مواردهم (عن علم أو عن جهل)، لكن كمان المشكلة الأهم هي تضييع الفرصة على الأهل إنهم يركزوا مع طفلهم في برنامج تأهيلي من برامج تعديل السلوك وتنمية مهارات التواصل اللي كل ما بدأت بدري كانت أفضل بكتير
والنتايج بتختلف من طفل لطفل، ففي حين إن بعض الأطفال ممكن بس تساعده البرامج يساعد نفسه في الاحتياجات الأساسية ويقدر يتواصل بشكل بسيط، أطفال تانيين بيتحسنوا لدرجة انك مش هتقدر تفرقهم عن أي طفل تاني حواليهم