استشارة نفسية 010

الاستشارة؛

عندي 19 سنه وشويه
انا كنت طول عمري متفوقه جدا وكان دايما ترتيبي عالي في دراستي من وانا صغيرة
كنت اغلب وقتي منعزله عن كل اللي في سني
كنت بميل لاني اقضي وقتي في القرايه
من اول م اتعلمت اقرا او من اول م افتكر اني دايما كنت بحب ادور علي الكتب العلميه وخاصة الكتب اللي كانت بتتكلم عن علم الفضاء والفلك وكتب الفيزياء والكيميا
كنت بخلص الكتاب في وقت قياسي جدا
بس طبعا من غير افهم ولا حرف انا كنت بعمل كده عشان كنت بحب كده وبس
……………………………
وطبعا كل م كنت بكبر كان ده بيكبر معايا
…………………………..
فضلت كده لحد م تميت 17 سنه ساعتها اتعرفت ع شاب مش هتكلم كتير بس حبيته وعارفه دلوقتي ان ده مش حب
بعد م يقرب من سنتين وونص انفصلنا
سنتين ونص لغي فيهم شخصيتي تماما كنت بسمع كلامه في اي حاجه وكل حاجه
كان بيهيني وبيزعقلي وبيتعامل معايا بمنتهي العنف وكنت بتقبل دخ
حصل بينا بعض التجاوزات اللي تندرج تحت مسمي العلاقه الجنسه غير الكامله
………….
ودي بالذات اكتر حاجه مكرهاني ف نفسي دلوقتي مش قادرة اعيش خسرت دراستي واتاخرت كتير اوي فيها بعدت عن الناس اكتر عندي اعراض نفسيه كتير وحشه بدات تاثر علي عضويا
مش عارفه اعمل ايه
دايما حاسه اني وحشه اوي

—

الرد؛

السلام عليكم

تعملي ايه؟ … ببساطة تبدي بداية جديدة

انت دخلت مشروع وخسر لكن لازال عندك كل حاجة

لازال عندك الشركة والموظفين والفلوس فينفع نبتدي تاني

راس مالك هو ذكائك والذكاء مش بيقل مع الزمن ومفيش حاجة اسمها اصل مخي بقى تخين ولا مبقتش افهم زي زمان

الانسان الذكي بيفضل ذكي

وبما إنك كنت متفوقة زمان فدا دليل ذكاء لأن التفوق مينفعش معاه كتر مذاكرة بس

لازم ذكاء ومذاكرة … الاتنين مع بعض

علشان كده بالنسبة لموضوع الدراسة فقط ثقى في نفسك وابتدي من جديد

مش عايز اتكلم كتير عن موضوع علاقتك لكن بإختصار كده العلاقات الناجحة والصحية هي بس اللي بتدوم

وعلشان تكون علاقة صحية لازم تكون معمولة في وقتها وبالظوابط اللي تسمحلها تعيش وكل الناس تعرفها مش اللي حريصين اننا نخبيها

واهم حاجة أن اي علاقة بتكون قائمة على أن الطرفين يكونو كسبانين مش حد يكسب والتاني يخسر واحديستغل والتاني يراضي

واحد يهين والتاني يستحمل

دا مش اسمه حب

قلبك (وطبعا جسمك) حاجة عظيمة هبة من ربنا سبحانة وتعالى متسلمهمش إلا للي يستحق ويدفع تمنهم بالكامل ومقدم… مفيش حاجة اسمها اصله هـا يخطبني … مفيش  “هـــا” دي خالص في القلب ولا في الجسم

انت كده بتدخلي رهان خسان في الغالب الغالب

ابتدي بداية جديدة فيها اتعلمي من أخطاء اللي فات واستغلي قدراتك اللي ربنا وهبهالك